WAAH KYA JOOD O KARAM

Waah kya Jood _o_ Karam hai Shahe Bat-ha Tera,
Nahi sunta hi nahi maangne wala Tera.

Dhare chalte haiñ Ataa ke wo hai qatra Tera,
Taare khilte haiñ Sakha ke wo hai zarra Tera.

Farsh wale teri Shaukat ka Uloo kya jaaneiñ,
Khusrawa Arsh pe udta hai Pharera Tera.

Aasmaañ khwaan zameeñ khwaan zamana mehmaan,
Saahib _e_ Khana Laqab kis ka hai Tera Tera.

Maiñ to Maalik hi kahoonga kee ho Maalik ke Habeeb,
Yani Mehboob -o_ Muhib meiñ nahi Mera Tera.

Tere Qadmoñ meiñ jo haiñ gair ka munh kya dekheiñ,
Kaun nazroñ pe chadhe dekh ke talwa Tera.

Chor Haakim se chhupa karte haiñ yaañ uske khilaaf,
Tere daaman meiñ chhupe chor anokha Tera.

Dil abas khauf se patta sa uda jaata hai,
Palla halka sahi bhaari hai bharosa Tera.

Ek maiñ kya mere isyaañ ki haqiqat kitni,
Mujh se sau lakh ko kaafi hai ishara Tera.

Muft paala tha kabhi kaam ki aadat na padi,
Ab Amal poochhte haiñ haaye nikamma Tera.

Tere tukdoñ se pale gair ki thokar pe na daal,
Jhidkiyañ khaayeiñ kahaañ chhord ke sadqa Tera.

Meri taqdeer buri ho to bhali karde kee hai,
Mehw _o_ Isbaat ke daftar pe karoda Tera.

Tu jo chahe to abhi mail mere Dil kee dhule,
Ke Khuda dil nahi karta kabhi maila Tera.

Kis ka munh takiye kahaañ jaaiye kis se kahiye,
Tere hi qadmoñ pe mit jaaye ye pala Tera.

Tere sadqe mujhe ek boond bahut hai Teri,
Jis din achhoñ ko mile jaam chhalakta Tera.

Haram _o_ Taiba wa Baghdad jidhar kije nigaah,
Joat padti hai teri noor hai chhanta Tera.

Teri Sarkaar meiñ laata hai RAZA us ko Shafee,
Jo mera *Gaus* hai aur laadla beta Tera.

✍️Kalaam Sayyadi Ala Hazrat imam Ahamad Raza Faazile Barelvi Alaihirramaturrizawan
___________________________________
🖌Post Credit - Shakir Ali Barelwi Razvi wa  Ahliya Mohtarma