Ne’amateiñ Bañt-ta jis samt wo zeeshan gaya,
Saath hi munshi _e_ rehmat ka qalamdaan gaya.
Le khabar jald kee gairoñ ki taraf dhyan gaya,
Mere Maula mere Aaqa tere qurbaan gaya.
Aah wo aañkh kee naakaame tamanna hi rahi,
Haaye wo dil jo tere dar se pur armaan gaya.
Dil hai wo dil jo teri yaad se ma’moor raha,
Sar hai wo sar jo tere qadmoñ pe qurbaan gaya.
Unheiñ jana unheiñ maana na rakha gair se kaam,
Lillahil hamd maiñ duniya se musalmaan gaya.
Aur tum par mere aaqa ki inayat na sahi,
Najdiyo! kalma padhaane ka bhi Ehsaan gaya.
Aaj le unki panaah aaj madad maang unse,
Phir na maaneñge qiyamat meiñ agar maan gaya.
Uf re munkir ye badha joshe ta’assub aakhir,
Bheed meiñ haath se kam bakht ke imaan gaya.
Jan _o_ dil hosh _o_ khirad sab to Madine pahuñche,
Tum nahi chalte "RAZA" saara to saamaan gaya.
✍️Kalaam Sayyadi Ala Hazrat imam Ahamad Raza Faazile Barelvi Alaihirramaturrizawan
___________________________________
🖌Post Credit - Shakir Ali Barelwi Razvi wa Ahliya Mohtarma
Post a Comment