Aap Islam Qubool Karne Wali Sab Se Pahli Khatoon Hain.
Allah Tala Ka Aapko Salam Kahna.
Aap Nabi Kareem ﷺ Ki Pahli Sharik Hayat Hain Aur Aapki Maujudgi Me Nabi Pakﷺ Ne Kabhi Dusra Nikah Nhi Farmaya. Aap Ke Alawa Kise Aur Azwaaj Motah'harat Ke Shikam Se Aulad Nhi Huyi.
Aap Khandan Quraish Ki Bahut Hi Bawaqar Wa Mumtaj Khatoon Hain. Aapke Walid Ka Naam Khuwailid Bin Asad Hai Aur Maa Ka Naam Fatima Binteha Jayidah Hai. Aapki Sharafat Aur Pak Daamani Ki Wajah Se Aapko Tahira Ke Laqab Se Pukara Karte The.
Aapne Huzoor Pak Ke Ikhlaq_O_Aadat Wa Kamaal Seerat Ko Dekh Kar Khud Hee Nabi Pak ﷺ Se Nikah Ki Ragbat Jahir Farmayi, Chunancha Ashraf Quraish Ke Majma Me Ba Qaiyedah Nikah Huwa. Ye Huzoor Pak Sallahu Alaihi Wasallam Ki Bahut Hi Janisar Sharik Hayat Hain. Ye Musalsal 25 Sal Tak Mahboobe Khuda Ki Janisari Aur Khidmat Gujari Ke Sharf Se Sarfaraj Hain. Aaqa Kareem Sallahu Alaihi Wasallam Ko Bhi Aap Se Is Qadar Muhabbat Thi Ki Aapke Wisal Ke Bad Bhi Aap Hazrat Aayesha Radi Allahu Anha Se Farmaya Karte The Khuda Ki Kasam Khadija Se Behtar Mujh Koi Biwe Nhi Mili. Jab Sab Logo'n Ne Inkar Kiya To Us Waqt Wo Mujh Pe Imaan Layein, Jab Sab Log Mujh Jhuthla Rahe The Us Waqt Unhone Meri Tasdiq Kee, Jis Waqt Koi Mujhe Kuch Dene Ko Tayyar Nhi Tha Us Waqt Khadija Ne Mujh Apna Pura Maal Diya Aur Unke Hi Shikam Se Mujh Aulad Huyi.
Jab Har Taraf Mukahlifat Ka Toofan Utha Hua Tha Aise Khatarnak Aur Khaufanak Waqt Me Ek Khadija Hi Ki Jaat Thi Jo Parwano Ki Tarah Huzoorﷺ Par Qurban Ho Rahi Thi Aur Aise Mushkil Auqat Me Jis Esteqlal Se Masaib Ke Muqabla Kiya, Us Khususiyat Ne Unhe Tamam Ajwaj Motah'harat Par Mumtaj Fazilat Hasil Hui.
Unk Fazail Me Bhut Si Hadise'n Bhi Aayi Hain.
Huzoor Akramﷺ Ne Farmaya Ki Duniya Ki Tamam Aurto'n Me Sab Se Jyadah Achchi Aur Bakamaal Char Biwiyan Hain- Ek Hazrat Maryam Dusri Hazrat Aayesha Tisri Hazrat Khadija Chauthi Hazrat Fatima.
Ek Martaba Hazrat Jibril Bargahe Risaalat Me Hazir Huye Aur Arz Ki Ya Rasoolallah Sallahu Alaihi Wasallam! Ye Khadija Hain Jo Aapke Paas Ek Bartan Me Khana Lekar Aarahi Hain. Jab Ye Aapke Paas Aajayen To Inhen Inke Rab Ka Aur Mera Salam Kah Dijiy Aur Ye Khushkhabri Suna Dijiye Ki Jannat Me Unke Liye Moti Ka Ghar Banaya Gaya Hai Jisme Na Koi Shor Hoga Na Koi Taklif Hogi.
Aaqa Kareemﷺ Ne Aap Ke Baad Bahut Si Aurto'n Se Nikah Farmaya Lekin Aapki Mohabbat Aakhir Umr Tak Huzoorﷺ Ke Qalabe Mubarak Me Rachi Basi Rahi, Yahan Tak Ki Aapke Wisal Ke Baad Jab Bhi Huzoor ﷺ Ke Ghar Bakri Jibah Hoti To Aap ﷺ Hazrat Khadija Ki Saheliyon Ke Yahan Bhi Jaroor Gosht Bheja Karte The Aur Hamesha Aap Unka Zikr Karte Rahte The.
Hizrat Se Tin Baras Qabl "65" Baras Ki Umr Me Maahe Ramzan Ki 10 Tarikh Ko Inteqal Huwa, Makka Sharif Ke Mash'hoor Qabristan Jannatul Mua'ala Me Khud Nabi Pakﷺ Ne Unko Unki Qabr Me Utara Aur Apane Muqaddas Hatho'n Se Unko Supurde Khak Farmaya, Us Waqt Namaz Janaza Ka Hukm Nhi Tha Isliye Aapki Namaze Janaza Nhi Padhi Gayi.
Hazrat Khadija Ke Inteqal Se Tin Ya Panch Din Pahle, Abu Talib Ka Inteqal Ho Gaya Tha Abhi Chacha Ki Wafat Ke Sadme Se Huzoorﷺ Ka Qalbe Nazuk Ranj_O_Gam Se Nidhal Tha Hi Ki, Hazrat Khadija Ka Bhi Inteqal Ho Gya!
Is Saniha Ka Qalbe Mubarak Par Itna Jabrdast Sadma Huwa Ki Aapn Us Saal Ka Naam Aamul Huzn (Gam Ka Saal) Rakh Diya.
___________________________________
🖌Post Credit - Shakir Ali Barelwi Razvi Wa Ahliya Mohatarma
Post a Comment