Gam ho gaye beshumaar Aaqaﷺ,
Banda tere nisaar Aaqaﷺ.
Bigda jaata hai khel mera,
Aaqa Aaqa sañwaar Aaqaﷺ.
Mañjdhaar pe aake naav doobi,
de haath ke hooñ maiñ paar Aaqaﷺ.
Tooti jaati hai peeth meri,
Lillah ye bojh utaar Aaqaﷺ.
Halka hai agar hamara palla,
Bhaari hai tera waqaar Aaqaﷺ.
Mujhsa koi gamzada na hoga,
Tum sa nahi gamgusaar Aaqaﷺ.
Tum woh ke karam ko naaz tumse,
Maiñ woh ke badee ko aar Aaqaﷺ.
Jiski marzi Khuda na taale,
Mera hai wo naamdaar Aaqaﷺ.
Itni Rehmat "RAZA" pe kar lo,
La Yaqrubuhul Bawaar Aaqaﷺ.
✍️Kalaam Sayyadi Ala Hazrat imam Ahamad Raza Faazile Barelvi Alaihirramaturrizawan
___________________________________
🖌Post Credit -Shakir Ali Barelwi Razvi wa Ahliya Mohtarma
Post a Comment